Rivendoset kryqi i Notre Dame, kur rihapet katedralja simbol e Parisit

Një kryq i madh në katedralen Notre Dame të Parisit, që i mbijetoi zjarrit shkatërrues të vitit 2019, u riinstalua në objektin e kultit pas një procesi të kujdesshëm restaurimi nga hekurpunues artistikë të ardhur posaçërisht nga Normandia.

Kryqi madhështor, i lartë 12 metra dhe i rëndë 1.5 tonë, është i vetmi element i çatisë së katedrales që i rezistoi flakëve të 5 viteve më parë. Ai u rivendos përmes një vinçi të madh.

Rreth 250 kompani dhe disa qindra zanatçinj, arkitektë dhe profesionistë kanë kontribuuar në procesin masiv të restaurimit, përmes të cilit synohet që Notre Dame të rihapë dyert më 8 dhjetor të këtij viti.

Zjarri, që ra më 15 prill 2019, shkaktoi shembjen e shtizës së godinës dhe të një pjese të çatisë së saj. Ndërsa sot, procesi i restaurimit ka shënuar hapa përpara, përfshirë rivendosjen e shtizës.

Ngjarja e 5 viteve më parë i shkaktoi një dëm të madh katedrales, një trashëgimi botërore e UNESCO-s dhe një simbol i rëndësishëm i krishterimit, që mirëpret rreth 12 milionë vizitorë në vit.

LEXONI GJITHASHTU:

• Restaurimi i Notre Dame, nis puna për pastrimin e xhamave me ngjyra
• Macron bën premtimin: Si sot një vit rihapen dyert e Notre Dame