Roland Lami: Mospranimi i zgjedhjeve është një rrugë e vështirë për Partinë Demokratike

Roland Lami, profesor i Universitetit Mesdhetar të Shqipërisë, foli për Euronews Albania mbi qëndrimin që po mban PD-ja pas zgjedhjeve të 25 prillit. Z. Lami tha se ka paqartësi nëse PD-ja do e pranojë apo jo rezultatin e zgjedhjeve, por ka të drejtë si parti që të hetojnë mbi procesin zgjedhor, nëse sipas tij, ka prova të siguruara.

“Opozita e ka vendosur veten në pozicion nëse do qëndrojë jashtë apo brenda institucioneve. Partitë politike që garojnë në zgjedhje, kanë të drejtën e tyre, nëse disponojnë prova të ndjekin procedurën për të atakuar të gjithë procesin zgjedhor nëse është i justifikueshëm pretendimi për të vënë në pikëpyetje procesin zgjedhor”, u shpreh z. Lami, suke shtuar se duhet pritur raportin përfundimtar të OSBE ODIHR-it.

Roland Lami u shpreh se nëse PD-ja nuk pranon rezultatin e zgjedhjeve, atëherë mandati i kandidatëve fitues të koalicionit të djathtë, do të quhet i pavlefshëm. Për z. Lami, qëndrimi i PD-së për të mos njohur zgjedhje nuk mund të sjellë asnjë rezultat pozitiv përveçse mbajtjen në krye të liderit aktual.

“Po delegjitimove procesin zgjedhor, del i pavlefshëm edhe mandati.  Është një rrugë pa krye dhe e mjegullt për Partinë Demokratike. Mund të jetë e vlefshme për lidershipin e PD-së që nëpërmjet mjegullnajës së standardit zgjedhor justifikon mbajtjen e drejtimit të partisë, por më duket e vështirë se PD-ja me këtë rrugë  të mund të pretendojë një rezultat pozitiv në zgjedhjet lokale apo në ato të përgjithshme”, u shpreh z. Lami.

Në lidhje me faktin nëse kreu i PD-së duhet të japë apo jo dorëheqje, Roland Lami tha se ky është një vendim moral që i përket vetë liderit dhe se z. Basha nuk ka asnjë detyrim ligjor për të dhënë dorëheqjen.

“Kreu i PD-së nuk ka asnjë detyrim statutor për të dhënë dorëheqjen pasi nuk e përcakton statuti. I është lënë interpretimit moral që bën vetë lideri. Për sa i përket debatit brenda PD-së, duhet të bëjmë një sqarim, nëse pretendimet nuk kthehen në shumica që do të materializohen në vota kur të vijë momenti i garimit apo i rimandatimit të z, Basha, e gjitha bëhet ushqim për mediat, pas sjellë rezultat.”

1. Lama tha më tej se në vendin tonë kemi një kulturë që, kryesisht, shumica e anëtarëve të partive orientohen drejt pushtetit.