EMRAT| Rrëmbim, grabitje e prostitucion, ekstradohen 3 shtetas në Itali dhe Turqi

Janë ekstraduar nga Shqipëria në drejtim të Italisë dhe Turqisë 3 shtetas, të cilët akuzohen për vepra të ndryshme penale.

Përmes një njoftimi Policia ka bërë të ditur se një 36-vjeçar turk, Koray Anic, është ekstraduar drejt Turqisë pasi ishte dënuar me 4 vjet, 6 muaj e 5 ditë burgim, për rrëmbim, posedim të armëve të zjarrit dhe armëve shpërthyese dhe për kanosje.

Po ashtu bëhet me dije se janë ekstraduar drejt italisë 2 shtetas shqiptarë, Mërgim Lazri dhe Andrea Ajasllari të akuzuar për grabitje me armë, shfrytëzim prostitucioni e kanosje.

Njoftimi i Policisë:

Policia e Shtetit/Operacioni “Para drejtësisë”, ekstradohen në Turqi dhe në Itali, 3 shtetas të kërkuar ndërkombëtarisht.

✅I ekstraduari në Turqi, i dënuar me 4 vjet e gjysmë burgim, për 3 vepra penale.

✅2 të ekstraduarit në Itali, njëri i akuzuar për grabitje me armë, me pasojë, ndërsa tjetri i akuzuar për shfrytëzim për prostitucion dhe për kanosje.

Si rezultat i koordinimit të punës dhe bashkëpunimit ndërmjet Interpol Tiranës dhe strukturave homologe në Turqi dhe në Itali, u finalizuan procedurat për ekstradimin e 3 shtetasve të shpallur në kërkim ndërkombëtar. Konkretisht:

-u ekstradua në Turqi, shtetasi turk Koray Anic, 36 vjeç, pasi Gjykata e Stambollit, në vitin 2024, e ka dënuar me 4 vjet, 6 muaj e 5 ditë burgim, për rrëmbim, posedim të armëve të zjarrit dhe armëve shpërthyese dhe për kanosje;

-u ekstradua në Itali, shtetasi shqiptar M. L., 27 vjeç, i lindur në Dibër, pasi Gjykata e Torinos, në vitin 2023, i ka caktuar masën e sigurisë “Arrest në burg”, për grabitje me armë, me pasojë. Në vitin 2021, 27-vjeçari dyshohet se ka plagosur me armë zjarri pronarin e një banese në Itali, ku kishte hyrë për të vjedhur, së bashku me shtetas të tjerë;

-u ekstradua në Itali, shtetasi shqiptar A. A., 49 vjeç, i lindur në Skrapar, pasi Gjykata e Komos, në vitin 2023, i ka caktuar masën e sigurisë “Arrest në burg”, për shfrytzim për prostitucion dhe për kanosje.

Operacioni “Para drejtësisë” vijon.

LEXONI GJITHASHTU:

• Siguroi kushte për vrasjen e Nuredin Dumanit, ekstradohet nga Kosova Arben Lamçja
• Kanosi gruan në sy të fëmijëve të mitur, ekstradohet nga Franca 48-vjeçari shqiptar