Ministri i Punëve të Brendshme të Kosovës, Xhelal Sveçla ka reaguar përmes një njoftimi në faqen e tij zyrtare në Facebook sa i takon rrëmbimit të tre policëve në veri të Kosovës, brenda territorit.

Ai u shpreh se diçka e tillë bie ndesh me çdo marrëveshje dhe çdo parimi të normave ndërkombëtare. Sveçla shtoi se Serbia po vazhdon të tregojë fytyrën e vërtetë, ndërsa garantoi që të tilla akte kriminale, as i trembin, as do t’i detyrojnë të tërhiqen.

Deklarata e plotë:

Përderisa rendi dhe ligji po zbatohet në vendin tonë, Serbia kriminale ka hyrë në territorin e Kosovës dhe ka kidnapuar 3 zyrtarë policorë të Republikës së Kosovës, në shkelje të çdo marrëveshje e kundër çdo parimi të normave ndërkombëtare.

Pa asnjë dyshim, zyrtarët tanë policorë kanë qenë të vendosur thellë brenda territorit të Republikës së Kosovës, në pikë kontroll statik, duke kryer detyrat e tyre të rregullta.

Serbia po vazhdon të jetë shkaktar dhe gardian i së keqes në rajon e në Kosovë. Ne nuk zmbrapsemi para kriminelëve e terroristëve. Serbia po tregon përsëri fytyrën e saj të vërtetë dhe atë të një shteti autokrat e agresor.

Kërkojmë nga faktori ndërkombëtar të rrisë urgjentisht presionin ndaj Serbisë që jo vetëm të lirojë zyrtarët tanë policorë por edhe të ndalë provokimet e saj.

Sjellje të tilla kriminale të Serbisë nuk na ndalin në rrugëtimin tonë të forcimit të sovranitetit në vend.

LEXONI GJITHASHTU:

• Rrëmbimi dhe vrasja e Jan Prengës, rinis gjyqi ndaj 7 anëtarëve të grupit kriminal
• “Serbia e Rusia s’do ia dalin”, Sveçla: Destabilizimin e Kosovës nuk e lejojmë