Rreth 1 mijë viktima nga përmbytjet në Pakistan

Numri i të vdekurve nga aksidentet e shkaktuara nga reshjet e dendura në Pakistan ka arritur në afro 1000 që nga fillimi i katastrofës në fillim të qershorit, thanë zyrtarët lokalë.

Autoriteti Kombëtar i Menaxhimit të Fatkeqësive të Pakistanit ka njoftuar në raportin e fundit se 45 persona kanë vdekur nga përmbytjet nga dje deri në ditën e sotme.

Zyrtarisht nga mesi i qershorit e deri më sot kanë vdekur 982 persona, ndërsa janë lënduar 1456, raporton “The Guardian”.

Këtij informacioni i duhet shtuar fakti se dhjetëra persona rezultojnë të zhdukur, pasi reshjet e musonit dhe përmbytjet e rrëmbyeshme kanë vazhduar në 24 orët e fundit.

Për shkak të fatkeqësive meteorologjike, 33 milionë pakistanezë janë pa strehim dhe dhjetëra mijëra njerëz janë zhvendosur.

Infrastruktura të shumta u dëmtuan ose u shkatërruan – rreth 100 shtëpi, 15 ura, si dhe rreth 50 restorante dhe hotele, veçanërisht në provincën e Svat.

LEXONI GJITHASHTU:

• Të paktën 182 persona humbën jetën nga përmbytjet në Afganistan