“Rreth 60% e kutive të numëruara”, Shehaj: Ja si qëndron diferenca e votave me PD-në

Nga pallati i sportit “Farie Hoti”, nga ku po zhvillohet procesi i rinumërimit të votave, Agron Shehaj, kryetar i partisë “Mundësia” vijon të jetë prezent duke monituar gjithë procesin.

Në një intervistë për Euronews Albania, Shehaj sqaroi se do vazhdojë qëndrimin e tij deri në mbylljen e procesit të rinumërimit, më tej, ai shpjegon se deri më tani janë numëruar rreth 60% e kutive. Kreu i partisë “Mundësia” ka vënë në dukje një element që sipas tij, PD ka si qëllim për të marrë mandatin e 14-të.

“Qëllimi i partive të tjera është të na marrin mandatin. Më saktë PD e ka shprehur qartë që synonte mandatin e 14 nga rinumërimi dhe ne do të jemi këtu. Ka gabime por është e vështirë të thuhet nëse janë gabime të qëllimshme apo njerëzore. Nuk kemi elementë për të dalë në konkluzion. Për ne është e rëndësishmë të rrimë këtu deri ditën e fundit.

Janë numëruar rreth 60% e kutive. Diferenca e votave me PD-në që synon amndatin e 14, nuk është e vogël, por nuk është as e madhe, është thelluar me rreth 100 vota. Jemi këtu për të monitoruar procesin, besoj dhe pak ditë na ndajnë nga rezultati përfundimtar”, tha Shehaj.