Rriten kursimet në banka, 137 mijë individë mbajnë 60% të depozitave

Depozitat e individëve arritën në 1.38 trilionë lekë në fund të vitit 2025, me një rritje vjetore prej 8.8%. Shifra del ne Raportin e Agjencisë së Sigurimit të Depozitave dhe dëshmon përveç rritjes së kursimeve edhe një hendek të zgjeruar mes depozitueseve.  

Kështu, numri i individëve që sigurohen nga skema e sigurimit të depozitave nësistemin bankar, në fund të vitit 2025 ishte 2.92 milionë.

Shifrat tregojnë se individë me më shumë se 2.5 milionë lekë në bankë ishin 137,500 me një portofol total 820 miliardë lekë. Në anën tjetër, 1.78 milionë depozitues me shuma deri në 2.5 milionë lekë zotëronin 568 miliardë lekë. E përkthyer në përqindje, kjo do të thotë se grupi me depozita mbi 2.5 milionë lekë mban 59% të depozitave të sigurueshme të individëve, ndërsa pjesa tjetër 41%. 

Nga një përllogaritje, depozituesi i grupit mbi 2.5 milionë lekë ka mesatarisht rreth 6 milionë lekë në bankë, ndërsa një depozitues i grupit tjetër ka rreth 320 mijë lekë. Pra, depozituesit e grupit të parë mbajnë gati 19 herë më shumë para se pjesa tjetër.

Në panoramën e përgjithshme, sistemi bankar shqiptar mbylli vitin 2025 me 1.84 trilionë lekë depozita, me rritje vjetore 9%.