Rriten të ardhurat në janar-mars, 80 mln euro më shumë se vjet

Arka e shtetit ka grumbulluar 1.6 mld euro në 3 muajt e parë të vitit. Të ardhurat, këtë periudhë janë rritur me 80 mln euro në krahasim me vitin 2023.

Të ardhurat totale në buxhet, për periudhën 3-mujore arritën në rreth 163.8 miliardë, ose 1.62 mld euro dhe për ministrinë e financave kjo shumë është përtej planit.

Një vit më parë, në të njëtën periudhë arka e shtetit mblodhi 80 mln euro më pak.

Dy zërat që kanë sjellë më pak të ardhura për 2024-ën, kanë qenë të ardhurat e mbledhura nga tatimi mbi fitimin me 13.7 % më pak se 3-mujori i parë i 2023 dhe të ardhurat nga renat minerare në eksport me 12.7% më pak se e njëjta periudhë në 2023.

Ndërkohë, të ardhurat e arkëtuara nga Tatimet dhe Doganat arritën në 1.48 miliardë euro, ose 9.2% më shumë krahasuar me të njëjtën periudhë të vitit 2023.

Gjithashtu shpenzimet e përgjithshme publike u rritën me 4.1 % më shumë krahasuar me të njëjtën periudhë në 2023. Sipas Ministrisë së Financave në 3-mujorin e parë shpenzimet publike kapën shifrën e 1.3 miliardë euro.

Bazuar në tablën e Ministrisë së Financave, diferenca mes të ardhurave dhe shpenzimeve, e nxjerr buxhetin me sufiçit 330 mln euro.

Krahasuar me të njëjtën periudhë të një viti më parë niveli i suficitit ka rezultuar 8% më i lartë.

LEXONI GJITHASHTU:

• “Pakti i AI” BE dhe Japonia të gati për bashkëpunim. Marrëveshja vuloset në 30 prill
• 27 të burgosur në IEVP Berat lanë qelinë duke përfituar nga amnistia