Rritet niveli i lumit Vjosë, bllokohet Ura e Mifolit

Niveli i lumit Vjosë po vazhdon të pësojë një rritje, ujë i cili kalon dhe urën e vjetër të Mifolit. Ura e Mifolit ndërkohë është bllokuar nga uji dhe policia ka vendosur shiritin për të mos lejuar banorët të kalojnë në atë territor.

Raportimet nga vendngjarja bëjnë me dije se uji i lumit Vjosë po mbulon çdo gjë në tregun e gjësë se gjallë në Mifol. Uji arrin deri në hyrjen kryesore të tregut nga ku ka nisur fortifikimi i saj me baltë, në mënyrë që të krijohet një barriere mbrojtëse për ujin e lumit.

Kjo situatë problematike ka vijuar prej disa ditësh nga moti i keq me reshje shiu dhe dëbore. Situata më problematike paraqitet në qarqet Shkodër, Vlorë, Lezhë, Durrës, Fier, Berat dhe Gjirokastër.

Për shkak të rritjes së niveleve të lumenjve në disa qarqe të vendit, janë shkaktuar përmbytje të tokave bujqësore dhe banesave, rrëshqitje dherash, dëmtime infrastrukturore dhe bllokime rrugësh.