Rritet presioni mbi Nuno Espírito Santo, Redknapp alarmon për rënien e West Ham

Presioni mbi trajnerin e West Ham, Nuno Espírito Santo, është shtuar ndjeshëm pas humbjes 2-1 ndaj ish-klubit të tij, Nottingham Forest, të martën në mbrëmje. Rezultati i fundit e zhyt edhe më tej ekipin londinez në krizë, teksa sezoni në Premier League po shkon drejt një skenari shqetësues.

West Ham ka regjistruar vetëm tre fitore në kampionat gjatë gjithë sezonit dhe rrezikon seriozisht rënien nga elita e futbollit anglez për herë të parë që nga viti 2012. Statistikat e Nuno Espírito Santo janë gjithashtu alarmante: vetëm dy fitore në 16 ndeshje që prej marrjes së drejtimit të skuadrës në shtator, pas largimit të Graham Potter.

Situata ka nxitur reagime edhe nga figura të njohura të klubit. Ish-trajneri i “Hammers”, Harry Redknapp, foli për TalkSPORT, duke shprehur gatishmërinë për t’u rikthyer në pankinë, madje edhe pa pagesë.

“Do të punoja falas për West Ham. Nuk është çështje parash, por kënaqësia për të qenë pranë lojtarëve dhe për të nxjerrë më të mirën prej tyre,” u shpreh Redknapp. Ai theksoi se kushdo që merr drejtimin e ekipit duhet të jetë i ashpër dhe të shfrytëzojë maksimalisht potencialin e një grupi që ai e cilësoi si mesatar.

Lidhur me rrezikun e rënies nga kategoria, Redknapp ishte edhe më pesimist: “Për momentin, West Ham nuk duket i aftë të qëndrojë në ligë. Ata kanë nevojë për një mrekulli.”

Sipas tij, Nottingham Forest është i vetmi rival në distancë të afërt, ndërsa skuadra si Leeds, Brentford dhe Sunderland po tregojnë formë shumë më të mirë. “Nëse duan të shpëtojnë, West Ham duhet patjetër të lërë pas Forest,” përfundoi ai.