Rritja e çmimit të energjisë, Basha propozon 7 nisma për të përballuar krizën

Kryetari i Partisë Demokratike, Lulzim Basha në një deklaratë për mediat iu përgjigjen deklaratës së kryeministrit Edi Rama që paralajmëroi rritje të çmimit të energjisë diktuar nga kriza globale energjetike.

Sipas kryedemokratit, shqiptarët kanë 8 vite që përballen me çmimet më të larta në rajon e ndër më të lartat në Europë, të energjisë dhe karburanteve për shkak të keqqeverisjes.

Basha propozoi 7 pika, ku sipas tij i duhet bërë presion qeverisë së bashku me qytetarët, në mënyrë që këta të fundit të mos vuajë makutërinë e kësaj pakice:

• 1 -Heqja e taksës Rama prej 240 lekë për litër karburanti;
• 2- Ulja e TVSH-së nga 20% në 6% për ushqimet, ashtu siç kemi kërkuar prej javës së parë në kuvendin e Shqipërisë;
• 3- Faturimi me çmime dhe sasinë reale të konsumit të oligarkëve të cilët favorizohen në kurriz të konsumatorëve;
• 4- Subvencionim i çmimit të energjisë për qytetarët;
• 5- Mirëmenanxhim dhe ndalje e shpenzimeve të shfrenuara, luksoze të OSHEE dhe KESH, që janë kthyer në zhvatës të parave të shqiptarëve.
• 6- Ristrukturim të buxhetit për tu përballur me një krizë që nuk mund të ndalet me propagandë dhe fjalime.
• 7 – Më shumë para për shtresat në nevojë dhe ristrukturim të ekonomisë aktuale, e cila për shkak të politikave të kësaj qeverie është e varur nga paraja e pisët dhe monopolet e oligarkëve.