Rritja e pensionit, të moshuarit në Elbasan të pakënaqur: Lëmoshë

Vendimi për rritjen e pensionit me 8.6% nuk i ka kënaqur aspak pensionistët në Elbasan.

Mosha e tretë në Elbasan thekson se shtesa e pensionit, sipas tyre është thjeshtë një lëmoshë.

“Kjo është një lëmoshë. Sepse edhe INSTAT-i e nxori 12.7% ndërsa këta na dhanë 6.8%. Pensionet kanë 11 vjet që nuk janë ngritur, ndryshe indeksimi, ndryshe rritja e pensionit. Këtu njerëzit janë të lodhur sepse Elbasani ka pasur industrinë më të rëndë në të gjithë Shqipërinë,” – u shpreh një pensionist.

“Me rritjen e çmimeve është shumë i dobët, po megjithatë faleminderit. Por kaq sa kemi kontribuar duhet te na shpërblejnë më shumë. Për ne është shumë e ulët se të marrë një gjyqtar 7 milionë, apo një ministër 3 milionë dhe ne të marrim 120 mijë lekë. Mendo se çfarë shkalle duhet të ndjekin ato që ne të na vlerësojnë. Unë sot jam 75 vjeç, ku e di unë tani sesa do shkoj edhe sa do shpërblehem,” – tha një pensioniste.

“Jo nuk ia dilet çmimet janë shumë shtrenjtë. Jemi pensionistë, kërkojmë më tepër ilaçe. Këto që bëjnë këto ligjet duhet të llogarisin edhe sa harxhon një familjar,” – shtoi një pensionist tjetër.

“Çfarë do të bëj me 180 mijë lekë pension, t’i marr ilaçe. Kam punuar 20 vjet ne metalurgji dhe se mora pensionin që më takonte. Unë marr borxh, kam marrë kredi dhe do e ha deri në fund. Më ka vdekur gruaja, jetoj vetëm, në fund fare do të lë shpinë të laj borxhin se s’kam çfarë të bëj tjetër,” – tha një tjetër pensionist.

Në qarkun e Elbasanit jetojnë afro 50 mijë pensionistë. Referuar shoqatave përfaqësuese të kësaj kategorie, problemet e tjera që hasin pensionistët janë varfëria dhe vetmia.

LEXONI GJITHASHTU:

• Sula: Gjyqtarët e Kushtetueses do marrin 10 mln lekë, pensionistët s’blejnë dot bukë
• Tabaku: Rritja e pensioneve 50 lekë në ditë. Do jenë aq të varfër nesër sa janë sot