Ruçi pret Vjosa Osmanin: Të mos lejojmë që e vërteta për Kosovën të përmbyset dhe dosja e Kosovës të hiqet nga tryeza e SHBA

Presidentja në detyrë e Kosovës vijon vizitën treditore në Shqipëri teksa sot është pritur në një takim nga kreu i Kuvendit, Gramoz Ruçi.

Zyra e shtypit e Kuvendit në një njoftim për mediat bën me dije se z. Ruçi vlerësoi qëndrimin ‘dinjtoz të drejtuesve  të institucioneve të Republikës së Kosovës dhe gatishmërinë e plotë të tyre për t’i dalë përballë drejtësisë dhe zbardhur të vërtetën e luftës së madhe për shpëtimin e popullit të saj nga krimet monstruoze dhe gjenocidi i Serbisë’, ndërsa shprehu mbështetjen në përpjekjet që imazhi i Kosovës dhe lufta e saj çlirimtare për liri të mos njolloset.

“Shqipëria është e bindur se të gjitha akuzat kundër udhëheqësve të luftës së drejtë të Kosovës, që fatkeqësisht bazohen në raportin-plagjiaturë të Dick Marty, kujtimet e prokurores Karla del Ponte dhe raportin e prokurorisë serbe, nuk janë të bazuara në prova, por në shpifje e fantazi të sëmura.

Kërkohet unifikimi i qëndrimeve politike e kombëtare të të gjitha institucioneve, forcave politike dhe zërave publikë, kombëtarë e ndërkombëtarë, të Kosovës dhe për Kosovën.

Të mos lejojmë që e vërteta e Kosovës të përmbyset dhe dosja e Kosovës të hiqet nga tryeza e Presidentit të Shteteve të Bashkuara të Amerikës. Te Presidenti Biden, Kosova ka një mbështetës edhe më të fuqishëm që e njeh mirë rajonin dhe Kosovën”, theksoi Kryetari i Kuvendit, z. Gramoz Ruçi.

nga ana e saj presidentja në detyrë, kryetarja e Kuvendit të Kosovës, znj. Vjosa Osmani, falenderoi Kryetarin e Kuvendit, z. Gramoz Ruçi, për bashkëpunimin, ndihmën dhe kontributin e Shqipërisë në mbështetje të Kosovës.

“Ne duhet të bashkëpunojmë qe e vërteta për Kosovën të mos përmbyset para syve tanë.  Duhet të tregojmë e ritregojmë të vërtetën e Kosovës. Duhet të punojmë për të kundërshtuar dhe rrëzuar argumentet e Serbisë që të mos njihet Kosova derisa të përfundojë dialogu.

Duhet tua bëjmë të qartë të gjithëve se dialogu Kosovë-Serbi nuk është për statusin e Kosovës. Ne vlerësojmë kontributin dhe zërin e Shqipërisë në institucionet dhe mjediset ndërkombëtare ku Kosova nuk është e pranishme”, nënvizoi znj. Vjosa Osmani.