Rusi, ushtria godet pusin e naftës me artilieri që të shmanget zjarri

Rusia deklaroi të premten se ka arritur të fikë me sukses zjarrin e ndezur në një pus nafte, në Siberi.

Zyrtarët u detyruan të kërkojnë ndihmën e ushtrisë, e cila përdori artilerinë, duke goditur pjesën e sipërme të pusit me predha antitank.

Pusi mori zjarr që ditën e 30 majit. Pamundësia për ta fikur bëri që autoritetet të kërkojnë ndihmën e ushtrisë këtë të premte.

Ushtarët dërguan artilerinë MT-12 Rapira në Siberinë e largët, dhe e goditën që 180 metra larg, në mënyrë që pjesa e sipërme e tubacioneve, e cila kishte marrë flakë, të shkëputej nga pusi.

Pasi arritën ta largojnë zjarrin, ekspertët izoluan grykën e pusit dhe morën masa për ta shuar zjarrin.

Ky pus ishte vetëm një nga shumë pikat që ka kompania Irkutsk në të gjithë vendin. Vetëm në vitin 2018, kjo kompani ka prodhuar rreth 9 milionë tonë naftë dhe gaz.