Të paktën 7 persona mbetën të vrarë dhe 11 të tjerë të plagosur në një sulm me raketa në qytetin e Lvivit, në perëndim të Ukrainës.

Sipas autoriteteve lokale, tre raketa goditën infrastrukturë ushtarake, ndërsa një tjetër ra në një fabrikë gomash.

“Sot në Ukrainë nuk ka vend të sigurt apo të pasigurt, të gjithë qytetarët e vendit janë të barabartë. Armiku po bëhet gjithnjë e më agresiv dhe sulmet ndaj objektivave civile do të intensifikohen”, tha Andriy Sadovyi, kryebashkiaku i Lvivit.

Autoritetet deklaruan se raketat ranë në zona të afërta me një stacion hekurudhor dhe goditën një linjë hekurudhore, duke ndërprerë për një moment lëvizjen.

Ndërkohë, dy persona të tjerë mbetën të vrarë nga bombardimet në qytetin e Kharkivit.

Analistët ushtarakë thonë se Rusia po shton sulmet ndaj fabrikave të armëve, hekurudhave dhe infrastrukturës strategjike në mbarë Ukrainën, me qëllim dobësimin e kapaciteteve të vendit për të mbrojtur Donbasin, rajoni rusishtfolës të cilin Moska synon ta bashkojë me territorin e Rusisë.

LEXONI GJITHASHTU

• Putin nderon brigadën e akuzuar nga Ukraina për krime lufte në Buça
• Banorët e fshatit ukrainas përballen me shkatërrimin e lënë pas pushtimit rus