Rusia hoqi guvat që shënonin kufirin ujor me Estoninë, reagon ashpër BE

Bashkimi Evropian ka kritikuar ashpër lëvizjen e Rusisë, që largoi bovat nga lumi Narva që shënonin kufirin me Estoninë, duke e quajtur atë të “papranueshme”.

Mëngjesin e së enjtes, trupat ruse hoqën 24 nga 50 bova që ndodheshin prej dekadash në lumë për të parandaluar gabimet gjatë lundrimit të mjeteve.

Tensionet në kufirin mes Rusisë dhe shtetit baltik janë rritur që nga nisja e pushtimit të Ukrainës në shkurt të vitit 2022.

Shefi i Politikës së Jashtme të BE-së, Josep Borrell e cilësoi manovrën e Moskës një veprim “provokues”.

“Ky incident kufitar është pjesë e një qasjeje me veprime provokuese dhe të stilit hibrid nga Rusia, si në kufijtë ujorë edhe në ata tokësor në rajonin e detit Baltik”, deklaroi Përfaqësuesi i Lartë i Unionit.

Ai shtoi se Bashkimi Evropian pret një sqarim nga Rusia, si dhe kthimin e menjëhershëm të bovave në vendin e tyre.

Nga ana tjetër, Ministria e Jashtme e Estonisë deklaroi se do të vazhdojë të qëndrojë “e qetë dhe me sytë hapur”, duke përdorur zyrtarët kufitarë dhe kanalet diplomatike për të kërkuar një sqarim zyrtar nga Moska.

Ndërsa kryeministrja Kaja Kallas akuzoi Rusinë se i kryen këto veprime në kufi për të nxitur frikë dhe ankth, për të shkaktuar pasiguri tek popullsia.

LEXONI GJITHASHTU:

• Shtetet e NATO-s në kufi me Rusinë do të ndërtojnë “mur me dronë”
• Kremlini paralajmëron NATO: Kujdes, po ju vëzhgojmë