Rusia i rikthehet marrëveshjes për eksportet e grurit ukrainas

Rusia ka thënë të mërkurën se do të rikthehet në marrëveshjen që mundëson eksportimin e produkteve të grurit nga Ukraina.

Moska ka pezulluar pjesëmarrjen në fundjavë duke kërcënuar me përshkallëzim të krizës ushqimore në gjithë botën.

Marrëveshja mes Ukrainës dhe Rusisë është arritur muaj më parë me ndërmjetësim të Kombeve të Bashkuara dhe Turqisë.

Ministria ruse e Mbrojtjes ka thënë se ka pranuar garanci me shkrim nga Kievi se korridori në Detin e Zi, për bartje të grurit, nuk do të përdoret për operacione ushtarake kundër Rusisë.

“Federata e Rusisë konsideron se garancitë e pranuara janë të mjaftueshme, andaj do të zbatojë sërish marrëveshjen”, është thënë në deklaratën e ministrisë.

Presidenti turk, Recep Tayyip Erdogan, ka thënë se ministri rus i Mbrojtjes, Sergei Shoigu, i ka thënë homologut të tij turk se marrëveshja e 22 korrikut do të zbatohet prej mesditës së 2 nëntorit.

LEXONI GJITHASHTU:

• Rusia bllokon eksportin e grurit ukrainas, Haxhiymeri: Kemi rezerva për 3 muaj
• Rusia “po rekruton ushtarë afganë të trajnuar nga SHBA-ja”