Rusia kryen sulme masive ajrore në Ukrainë, viktima dhe dëme në zonat e banuara

Forcat ruse kanë kryer sulme masive ajrore në Ukrainë këtë të enjte, duke përdorur dronë dhe raketa për të shënjestruar disa rajone, njoftojnë autoritetet ukrainase.

Sipas tyre, sulmet shkaktuan viktima civile dhe dëme të mëdha në ndërtesa banimi dhe infrastrukturë. Forcat Ajrore ukrainase raportuan se Rusia lëshoi gjatë natës 574 dronë dhe 40 raketa.

Në Lviv, një qytet në perëndim të Ukrainës, sulmet shkaktuan një të vdekur dhe plagosën dy persona të tjerë, ndërkohë që dhjetëra ndërtesa banimi u dëmtuan, sipas guvernatorit rajonal, Maksym Kozytskyy. Në Mukaçevo, në rajonin Zakarpatija pranë kufirit perëndimor, 12 persona u plagosën në disa sulme me raketa, njoftoi këshilli i qytetit.

Edhe në jug të Zaporizhjës, raketat ruse goditën zona të banuara, duke plagosur një grua 85-vjeçare dhe duke shkaktuar dëme të ndërtesave banimi, thanë autoritetet lokale.

Ministri i Jashtëm ukrainas, Andriy Sybiha, dënoi sulmet dhe shkroi në X se Rusia kishte përdorur “qindra dronë dhe raketa hipersonike, balistike dhe lundruese” kundër civilëve dhe infrastrukturës energjetike. Ai shtoi se një nga raketat goditi një fabrikë të madhe amerikane për pajisje elektronike, duke shkaktuar viktima dhe dëme të konsiderueshme.

Sulmet ndodhën pak ditë pas takimit të presidentit ukrainas, Volodymyr Zelensky, me presidentin amerikan Donald Trump dhe udhëheqës evropianë në Uashington, ku diskutohej mbi garancitë e mundshme të sigurisë për Ukrainën dhe një program prej 90 miliardë dollarësh për blerjen e armëve amerikane.

Rusia mohon të ketë synuar objektet civile, por sulmet vazhdimisht kanë prekur shtëpi, spitale, shkolla dhe ndërtesa energjetike. Bisedimet diplomatike mbeten të pasigurta, ndërkohë që udhëheqësit evropianë shprehin skepticizëm për gatishmërinë e presidentit rus Vladimir Putin për të marrë pjesë në diskutime pa presion nga SHBA-ja.

LEXONI GJITHASHTU:

• Video/ Momenti kur Zelensky takon liderët e evropianë: Ukraina, gati për armëpushim
• Sulmet ruse vrasin civilë ukrainas para takimit të rëndësishëm në Uashington