Rusia në test, Moska simulon reagimin bërthamor ndaj një sulmi armik

Agjencitë ruse të lajmeve vazhdojnë të përmendin fjalën “bërthamore”. Dhe në fakt, ushtria ruse nisi të mërkurën një seri manovrash që simulonin një sulm masiv atomik ndaj një kundërshtari.

Presidenti Vladimir Putin e ndoqi stërvitjen ‘live’ në ekrane të mëdha të vendosura në zyrën e tij. Ai përsëriti akuzat kundër përpjekjeve të Ukrainës për të prodhuar një bombë me efekte radioaktive.

Si Kievi edhe NATO i hedhin poshtë akuzat duke i cilësuar si të pabaza dhe si një pretekst nga Moska për të përshkallëzuar konfliktin pas humbjeve në lindje dhe jug të Ukrainës.

Gjatë stërvitjeve ushtarake u qëlluan raketa balistike dhe “Cruise”, ndërsa u përfshinë edhe nëndetëset dhe avionët luftarakë.

Sipas Uashingtonit, deri tani Rusia ka vepruar në përputhje me marrëveshjen e kontrollit të armëve dhe ka raportuar kryerjen e stërvitjeve të kapaciteteve të saj bërthamore.

Megjithatë, stërvitjet ruse konsiderohen si një kontrast ndaj atyre vjetore të NATO-s në veri-perëndim të Evropës, që do të mbyllen më 30 tetor.

LEXONI GJITHASHTU:

• Zelensky: Rusia ka shkatërruar mbi një të tretën e sektorit të energjisë në Ukrainë
• Steinmeier premton mbështetje për Ukrainën, vijojnë sulmet nga Rusia