Rusia nuk ndikon në protestat e RMV, thotë ambasada ruse

Ambasada ruse ka njoftuar se nuk ka ndikuar dhe as nuk ka për qëllim të ndikojë në çështjet e brendshme të asnjë shteti.

Reagimi erdhi pas deklaratave të presidentit Stevo Pendarovski dhe ministrit të brendshëm Oliver Spasovski se Rusia ka ndikuar në protestat e Maqedonisë së Veriut dhe synon destabilizimin e vendit.

“I hedhim poshtë akuzat e drejtuara ndaj shtetit tonë. Kjo është në kundërshtim me filozofinë e politikës së jashtme ruse. Dihet se këto tentime asnjëherë nuk e sjellin efektin e dëshiruar dhe në fund ata që ndërmarrin kësi lloj hapash mbeten të diskredituar,” – thuhej në njoftimin e ambasadës ruse.

Në deklaratë theksohej se Rusia respekton zgjedhjen e popullit maqedonas dhe është e gatshme të vazhdojë bashkëpunimin me RMV-në.

Ministria e Jashtme e Bullgarisë i ka dërguar notë proteste ministrisë së Jashtme të Maqedonisë së Veriut, për shkak të protestave dhe parullave, që sipas këtij institucioni i janë drejtuar shtetit bullgar.

Përmes një deklarate, ministria e Jashtme bullgare shprehet e shqetësuar me situatën në Maqedoninë e Veriut, ku aktet dashakeqe po ndodhin teksa Sofja dhe Shkupi po përpiqen që të gjejnë një zgjidhje të pranueshme përmes dialogut.

LEXONI GJITHASHTU:

• Bullgaria i dërgon notë proteste Maqedonisë së Veriut