Rusia refuzon lirimin e reporterit të ‘Wall Street Journal’

Një gjykatë ruse ka rrëzuar apelin e gazetarit amerikan Evan Gershkovich kundër paraburgimit të tij, duke e lënë në qeli.

Gershkovich u paraqit në gjykatën e Moskës ditën e martë, duke u shfaqur për herë të parë në publik disa javë nga arrestimi.

Ai u arrestua në qytetin Jekaterinburg teksa punonte për gazetën amerikane “Wall Street Journal” dhe u akuzua për spiunazh.

Gjatë seancës, Gershkovich qëndroi i qetë, me duart e kryqëzuara prapa një xhami anti-plumb. Ai bëri një buzëqeshje të shpejtë, por nuk tha asgjë për gazetarët e pranishëm.

Trupa gjykuese hodhi poshtë ofertën e ekipit ligjor të gazetarit për ta liruar kundrejt garancisë financiare prej 50 milionë rublash, ose 614 mijë dollarë, ose që ta vendoste në arrest shtëpie.

Tani, Gershkovich do të qëndrojë në një ish-burg të KGB-së të paktën deri 29 majin e ardhshëm.

Përveç avokatit të tij, në sallën e gjyqit ishte e pranishme ambasadorja amerikane në Moskë, Lynne Tracy.

Procesi u zhvillua në të njëjtën sallë ku kritiku i Kremlinit, Vladimir Murza u dënua me 20 vjet burg për tradhti ditën e hënë.

LEXONI GJITHASHTU:

• Beteja për Bakhmutin. Rrusia pretendon avancimin, Kievi: Qytetin e kontrollojmë ne
• Putin: Kina dhe Rusia po bashkëpunojnë aktivisht në fushën e mbrojtjes