Rusia thotë se Ukraina po i vazhdon sulmet raketore kundër rajonit të saj

Rusia ka thënë të premten se Ukraina po i vazhdon sulmet raketa ndaj rajonit të saj, Belgorod, derisa Kievi tha se Moska i sulmoi shtatë rajone ukrainase me 27 dronë të llojit “Shahed” dhe me tetë raketa mëngjesin e së premtes.

“Të gjithë 27 dronët u rrëzuan mbi rajonet Kirovohard, Mikolaiv, Herson, Hmelnitski, Vinitsia dhe Kiev”, tha ushtria ukrainase në një komunikatë.

Nuk u raportua për viktima apo dëme.

Ushtria ukrainase nuk tregoi nëse i ka rrëzuar edhe raketat ruse.

Ajo tha gjithashtu se forcat ukrainase u angazhuan në 76 beteja nga afërsia në 24 orët e fundit në zonat e rajonit lindor Donjeck, Novopavlivka, Avdivka dhe Liman.

Ndërkohë, Ministria e Mbrojtjes e Rusisë tha se Ukraina e sulmoi rajonin e saj kufitar, Belgorod, përsëri të premte, duke i hedhur mbi të shtatë raketa “Vampir”, të cilat u rrëzuan nga sistemet e mbrojtjes raketore ruse.

Ajo nuk tregoi nëse ka pasur viktima apo dëme nga këto sulme.

Kanali Baza në Telegram e postoi një video ku shihet një veturë duke u djegur në një rrugë në kryeqytetin rajonal, Belgorod, i cili është duke u sulmuar nga Ukraina në tri ditët e fundit.

Aleksei Kulemzin, kryetari i emëruar nga Moska në qytetin e okupuar nga Rusia, Donjeck, tha në Telegram se tre fëmijë u vranë nga bombardimet ukrainase të premten.

Pretendimet e tij nuk kanë mundur të verifikohen në mënyrë të pavarur.

LEXONI GJITHASHTU: 

• Lufta në Gaza, 7 të vdekur dhe 86 të plagosur nga sulmet izraelite në 24 orë
• E moshuara në Durrës raportohet e vdekur brenda banesës, gjendet me shenja jete