Sa afganë të strehuar u larguan nga Shqipëria?

2400 afganë janë strehuar në Shqipëri që nga 27 gushti.

Euronews Albania mëson se vetëm 300 prej tyre janë larguar në SHBA dhe Kanada. 2100 afganët e mbetur po qëndrojnë në Shëngjin dhe Durrës në pritje të vizave.

Vetë afganët shprehen se largimi nga vendi i lindjes nuk ishte i lehtë për ta. Por mikpritja që gjetën duket se ua ka lehtësuar këto pesë muaj qëndrimi në Shqipëri.

“Në Shqipëri gjithçka më pëlqen, bukuritë, kultura, njerëzit. është vend i mrekullueshëm. Të linim vendin tonë ishte gjëja më e vështirë për ne” u shpreh Mara Talash.

“Nuk na trajtojnë si të huaj, dje isha tek berberi dhe duhet ti jepja 500 lekë, dhe ai më tha shko është falas për ty”, shtoi.

Dhimbja e largimit nga Afganistani mbetet ende e fortë për ata që ende janë larg familjes për shkak të regjimit taleban.

“Jam çdo ditë duke menduar për ta, jam shumë i mërzitur për ta. Po jetojnë me njerëz që nuk po respektojnë të drejtat e tyre. Të jem i sinqertë ata po vuajnë, thjesht po presin nga unë që të gjej një mundësi t’i marrë nga Afganistani”, tha Zafar Jaamy.

Qeveria ka deklaruar se qëndrimi i përkohshëm i afganëve në Shqipëri mund të zgjasë më shumë se një vit.