Sadetin Fishta, sindikata e Policisë: Efektivët nuk kanë pajisjet e duhura në aksione

Sadetin Fishta, kreu i Sindikatës së Policisë thotë se operacioni në Lezhë ka dështuar për shkak se Policisë së Shtetit i mungojnë disa elementë.

Ai renditi profesionalizmin e punonjësve të policisë, pajisjet që ata përdorin si dhe trajnimet që duhet të kryejnë për situata të ndryshme gjatë operacioneve.

Nga ana e kushteve të punës, Fishta tha se punonjësit e Policisë së Shtetit nuk kanë trajtimin e duhur financiar.

“Kemi punonjës policie pa sigurim jete, ka edhe shumë akte që janë në sirtar dhe nuk zbatohen”, tha ai.

Sipas Fishtës mosha mesatare e policisë i ka kaluar 48 vjeç, kemi dyfishin e moshës mesatare të Maqedonisë së Veriut apo Kosovës.

“Në situata të tilla, kur ka parcela me kanabis në të gjitha rastet ka persona të armatosur dhe asnjëherë nuk duhet të lëvizet pa plan masash”, tha ai duke iu referuar ngjarjes në Lezhë.