Sali Berisha nuk paraqitet në SPAK për shkak të gjendjes shëndetësore

Kryetari i Partisë Demokratike, Sali Berisha, nuk është paraqitur mëngjesin e kësaj të hëne në Prokurorinë e Posaçme, ku ishte i detyruar të shkonte në zbatim të masës së sigurisë “detyrim paraqitje”.

Ndërkohë që mbështetësit dhe pjesëtarët e grupit parlamentar demokrat ishin stacionuar përpara ambienteve të SPAK në pritje të ardhjes së tij, u bë e ditur se Berisha nuk do të paraqitej, për shkak të gjendjes së tij shëndetësore.

Gazetari i Euronews Albania, Ardit Hoxha, raportoi se arsyeja e mungesës së Berishës lidhet me një gjendje gripale që ai po kalon.

“Shkuarja e zotit Berisha në SPAK është anuluar për shkak të gjendjes së tij shëndetësore”, bëri të ditur Hoxha.

Ai shtoi se mbetet për t’u parë nëse Berisha ka anuluar vetëm paraqitjen në SPAK, apo edhe angazhimet e tjera të ditës.

“Do të shohim nëse zoti Berisha ka anuluar vetëm paraqitjen e sotme në SPAK, apo edhe konferencën e përditshme për shtyp dhe pjesëmarrjen në seancën plenare. Për momentin nuk ka ende konfirmim nëse ai do të jetë në selinë blu apo në Kuvend, apo nëse ka pezulluar të gjitha aktivitetet për shkak të gjendjes gripale që po kalon,” deklaroi gazetari.

Berisha është subjekt i një mase sigurie të vendosur nga Gjykata, e cila i kërkon të paraqitet periodikisht pranë Prokurorisë së Posaçme, në kuadër të hetimeve që po zhvillohen për dosjen “Partizani”.

LEXONI GJITHASHTU:

• Berisha thirrje Trump: Shpalli grupe terroriste organizatat kriminale shqiptare
• Berisha denoncoi trenin bullgar në Pekisht, Celibashi: Rasti duhet hetuar patjetër
• Berisha: Materiale zgjedhore dhe para u gjetën në një kafe në Pekisht, u blenë vota