Salianji firmos dhe dërgon nga burgu kallëzimin për “TIMS”

Ish-deputeti i PD-së Ervin Salianji ka bërë një kallëzim nga burgu në SPAK. Sipas tij hetimi parlamentar i bërë nën drejtimin e tij për “Tims” është “kyçur” në sirtarë dhe nuk i është dërguar organit të akuzës nga Kuvendi.

Salianji është shprehur se  Kryetarja e Kuvendit Spiropali, ka shkelur rregulloren, dhe mban në sirtar përtej afateve të përcaktuara, dosjen e firmosur nga Ervin Salianji, që tanimë duhej të ishte në SPAK.

Ish-deputeti Salianji përmes kabinës telefonike në burgun ku mbahet si i dënuar politik, u shpreh:

“Të gjenden arsyet, qëllimi dhe përgjegjësia për këtë akt të rënde, të pengimit të drejtësisë dhe mbrojtjes së krimit, që të çon vetëm në një drejtim! Autori është Edi Rama.

Ky skandal, ku doganierja e parlamentit nuk e dërgon në SPAK hetimin parlamentar pavarësisht se ligji e parashikon dhe kryetari i komisionit e ka depozituat prej muajsh, duhet hetuar! Ato hetime parlamentare janë punë e kontribut disa mujor me kolegë dhe ekspertë dhe është një shërbim i vyer ndaj interesit publik, lidhur me nderhyrjet kriminale në sistemin TIMS. Ato konkluzione janë serioze dhe profesionale dhe ndihmojnë në zbardhjen e të vërtetës dhe të përgjegjësive. Nuk janë rekuizita personale e një kryeparlamentareje kukull. E ka për detyrë të bëjë atë që thotë rregullorja.

Padyshim se ajo njeh Skenderbeun e saj mbi çdo normë e ligj dhe është gati të bëjë kamikazen. Por krimi i TIMS në këtë mënyrë dyfishohet. Ndërhyrjeve të paligjshme në sistem u shtohet paligjshmeria e Spiropalit që nuk dërgon dosjen në SPAK.

E gjitha kjo vërteton se gjetjet e Opozitës qëndrojnë. Vërteton dhe një herë lidhjet e qeverisë me krimin, dhe shërbimin e saj ndaj bandave.

Jam i bindur edhe më shumë sot se një nga arsyet e burgosjes time politike është dhe zbulimi i manipulimeve me TIMS për të ndihmuar krimin e organizuar.

Dhe kjo është padyshim një arsye e një motiv më shumë për betejë me regjimin, dhe një konfirmim i kauzave tona të drejta”.

LEXONI GJITHASHTU:

• Ilir Meta takon Ervin Salianjin: Më bindi se burgu politik ndez frymën e ndryshmit
• Salianji reagon nga burgu: Një hap më shumë drejt Brukselit, melhelm për Shqipërinë