Salianji në burg për kallëzim të rremë, Kuvendi njofton KQZ për mandatin e deputetit

Kuvendi ka njoftuar me anë të një shkerse zyrtare KQZ-së, lidhur me mandatin e deputetit Ervin Salianji.

Ky i fundit është dënuar me një vit burg nga gjykata e apelit për dhënien e dëshmisë së rreme lidhur me çështjen “Babale”.

Kuvendi ka njoftuar Komisionin Qendror të Zgjedhjeve për krijimin e vakancës së deputetit.

“Kuvendi i Shqipërisë, në bazë të shkronjës “dh” të pikës 2 të nenit 71 të Kushtetutës së Republikës së Shqipërisë dhe Rregullores së Kuvendit, Ju njofton mbarimin përpara afatit të mandatit të deputetit të PD-së Ervin Salianji, për shkak të dënimit të tij me vendim të formës së prerë për kryerjen e një vepre penale, njoftuar në seancën plenare të datës 30.9.2024.

Sa më sipër, në mbështetje të nenit 164, pika 1, të ligjit nr. 10019, datë 29.12.2008 “Kodi Zgjedhor i Republikës së Shqipërisë”, Kuvendi i Shqipërisë ka detyrimin ligjor për të njoftuar Komisionin Qendror të Zgjedhjeve për krijimin e vakancës”,-thuhet në dokumentin e dërguar.