Salvini: Kam mbrojtur Italinë kundër emigracionit masiv, s’e jap dorëheqjen

Ministri italian i Transportit Matteo Salvini sot, pasi mbërriti në sallën e gjyqit në Palermo, ku po gjykohet për pengimin e zbarkimit të 147 emigrantëve nga anija e shpëtimit, tha se veprimet e tij ishin vetëm “mbrojtja” e Italisë dhe se ai nuk planifikon të japë dorëheqjen.

“Jam absolutisht krenar për atë që kam bërë, kam mbajtur premtimet e mia, kam luftuar kundër emigracionit masiv dhe cilido qoftë dënimi për mua, sot është një ditë e mirë sepse jam krenar që kam mbrojtur vendin tim. Do ta bëja sërish nga e para dhe po shkoj në sallën e gjyqit krenar për punën time”, tha Salvini.

Zëvendëskryeministri italian u tha gazetarëve të mbledhur se nuk ka në plan të japë dorëheqjen pavarësisht rezultatit dhe kujtoi se sot pritet vendimi i shkallës së parë, raporton Rai.

Nëse shpallet fajtor, Salvini mund të dënohet me gjashtë vjet burg. Salvini, i cili ishte ministër i Brendshëm në vitin 2019, u përpoq të parandalonte organizatën humanitare spanjolle “Open Arms” që të sillte 147 azilkërkues në Itali, si pjesë e politikës së tij për mbylljen e porteve për emigrantët dhe reduktimin e mbërritjeve të parregullta.

LEXONI GJITHASHTU:

• Salvini: Trump meriton çmimin Nobel për paqe po ndali luftën në Ukrainë
• Salvini rrezikon 6 vite burg, ekstremistët evropianë mblidhen në Itali: Hero!