Samiti i BE, Osmani udhëton në Bruksel: Prioritet, heqja e masave ndaj Kosovës

Presidentja e Kosovës, Vjosa Osmani ka udhëtuar këtë të marte drejt Brukselit. Udhëtimi i Osmanit ka ardhur lidhur me Samitin e Liderëve BE-Ballkan Perëndimor i cili do të zhvillohet nesër në Bruksel.

Presidenca njofton se në këtë Samit do të diskutohet partneriteti ndërmjet Bashkimit Evropian dhe Ballkanit Perëndimor, me theks të veçantë në procesin e zgjerimit të BE-së dhe avancimin e perspektivës evropiane të rajonit.

Presidentja do të ketë takime me liderë të institucioneve të BE-së dhe do të ketë mundësi të bisedojë me liderë të tjerë pjesëmarrës lidhur me çështje me interes të Kosovës. Heqja e masave ndaj Kosovës dhe ecja përpara në rrugën e integrimit do të zënë prioritet gjatë diskutimeve.

Në agjendën e diskutimeve të Samitit përfshihen gjithashtu Plani i Rritjes për Ballkanin Perëndimor, forcimi i integrimit ekonomik me tregun e përbashkët të BE-së, si dhe çështje që lidhen me zhvillimin ekonomik, investimet dhe reformat.

Sipas njoftimit të presidencës, liderët do të diskutojnë për bashkëpunimin në fushën e sigurisë dhe mbrojtjes, përfshirë politikën e përbashkët të jashtme dhe të sigurisë, përballjen me kërcënimet hibride dhe kibernetike, si dhe menaxhimin e migracionit dhe sfidat e përbashkëta rajonale dhe evropiane.

LEXONI GJITHASHTU:

• Mijëra gjurmë dinosaurësh zbulohen në luginën Fraele në Itali
• Skandali “Qatargate”, Parlamenti Evropian i heq imunitetin eurodeputetes italiane