Sanksione nga SHBA ndaj zyrtarëve palestinezë: Po minojnë përpjekjet për paqe

Shtetet e Bashkuara vendosën të enjten sanksione ndaj disa zyrtarëve të Autoritetit Palestinez dhe anëtarëve të Organizatës për Çlirimin e Palestinës (PLO), duke i akuzuar këto entitete për veprime që, sipas Uashingtonit, po minojnë përpjekjet për paqe në Lindjen e Mesme.

Në një deklaratë zyrtare, Departamenti i Shtetit bëri të ditur se të prekurve nga sanksionet do t’u ndalohet marrja e vizave për të udhëtuar në SHBA. Megjithatë, nuk u publikuan emra specifikë të individëve të sanksionuar.

Sipas deklaratës, PLO dhe Autoriteti Palestinez janë përfshirë në përpjekje për të ndërkombëtarizuar konfliktin me Izraelin, përfshirë përmes çështjeve të ngritura në Gjykatën Ndërkombëtare Penale. Uashingtoni i akuzon gjithashtu për mbështetje të terrorizmit dhe për mosrespektim të angazhimeve të tyre të mëparshme në procesin e paqes.

“Është në interesin tonë të sigurisë kombëtare të vendosim sanksione dhe të mbajmë përgjegjës PLO-në dhe Autoritetin Palestinez për minimin e perspektivave për paqe”, thuhet në deklaratën e Departamentit të Shtetit.

Ky vendim i Uashingtonit vjen në një moment kritik diplomatik, pasi disa vende evropiane – përfshirë Francën dhe Britaninë e Madhe – kanë shprehur gatishmërinë për të njohur një shtet palestinez në margjinat e Asamblesë së Përgjithshme të OKB-së që do të mbahet në shtator.

Autoriteti Palestinez, i drejtuar nga presidenti Mahmoud Abbas, ushtron qeverisjen në Bregun Perëndimor të pushtuar. Ndërkohë, PLO, e themeluar në vitin 1964, përfaqëson interesat e përgjithshme të popullit palestinez në arenën ndërkombëtare.

LEXONI GJITHASHTU: 

• Trump kërkon dorëzimin e Haamasit: Mënyra më e shpejtë për t’i dhënë fund krizës

• Trump kërcënon Medvdev: Shiko punët e tua, president i dështuar!