Sekretari i PD-së Ivi Kaso: Propozimi i opozitës hap vërtetë 100% listat e kandidatëve

Sekretari i Partisë Demokratike për Çështjet Zgjedhore, Ivi Kaso analizoi për Ilva Now në Euronews Albania zhvillimin e fundit për sa i përket reformës zgjedhore.

Kaso e cilësoi propozimin e fundit të opozitës si “propozim i hapjes së vërtetë 100 për qind të listave të kandidatëve”.

“Kemi dhënë dakordësi për hapjen e listave të kandidatëve duke menduar se kështu adresojmë shqetësimin e qytetarëve, por kemi kërkuar garanci që shumica socialiste nuk do të ndryshojë e vetme rregullat e lojës për sa i përket ndalimit në ligjin zgjedhor, pasi Kushtetuta nuk i ndalon, të koalicioneve parazgjedhore në formatin aktual,” – u shpreh Kaso, i cili tha me besim se nëse socialistët e kanë të vërtetë vullnetin për të hapur listat ata do ta votojnë propozimin e saj.

Sekretari i PD-së tha se formula socialiste e listës së kandidatëve është më e komplikuar ndërkohë që me draftin e opozitës ai tha se tregohet se tashmë është plotësisht e mundshme që të hapen listat dhe të ruhet formula aktuale e koalicioneve.

I vënë përballë qëndrimit të socialistëve se koalicionet nuk mund të qëndrojnë sipas formulës me listë të hapur, Kaso tha se nuk ka asnjë shpjegim bindës për këtë, ai rikujtoi kushtet e vendosura nga partneritetet ndërkombëtar, ku kryesore është reforma zgjedhore.