Sekretari Lloyd Austin viziton Ukrainën, e siguron për mbështetje kundër Rusisë

Sekretari i Mbrojtjes i Shteteve të Bashkuara, Lloyd Austin, ka mbërritur në Kiev të hënën në shenjë mbështetje për Ukrainën, pasi janë rritur shqetësimet se aleatët perëndimorë të Kievit, posaçërisht SHBA-ja, e cila është përkrahësi i tij më i madh ushtarak dhe financiar – janë “lodhur nga lufta”.

“Sapo mbërrita në Kiev për t’u takuar me liderët ukrainas”, shkroi Austin në rrjetin social X.

“Jam këtu sot për ta dhënë një mesazh të rëndësishëm, Shtetet e Bashkuara do të vazhdojnë të qëndrojnë përkrah Ukrainës në luftën e saj për liri kundër agresionit të Rusisë, tani dhe në të ardhmen”, shtoi Austin.

Kjo është vizita e dytë e Austinit në Ukrainë, i cili udhëtoi me tren drejt Kievit nga Polonia.

Uashingtoni i ka dhuruar Ukrainës ndihma ushtarake dhe të tjera në vlerë dhjetëra miliarda dollarë prej se Rusia e nisi pushtimin e saj të paprovokuar në shkurt 2022.

Derisa Austini mbërriti në Kiev, një ushtar ukrainas dhe një grua u vranë nga shpërthimi i një granate në një banesë në rrethinën e Kievit, Dnipro, thanë autoritetet në kryeqytetin ukrainas. Një person tjetër u plagos dhe u dërgua në spital.

Shkaktari i shpërthimi nuk dihet, tha policia, duke shtuar se hetuesit janë në vendin e ngjarjes duke u marrë me rastin.

LEXONI GJITHASHTU:

• Raketa ndaj Ukrainës, bombardohen Kievi dhe Khersoni, dëmtohet infrastruktura civile
• Bisedime në samitin e Maltës, Kiev-Moskë akuzojnë njëra-tjetrën