Sekretari Organizativ i FRPD: S’e kemi bërë mirë detyrën, kemi dështuar me të rinjtë

Sekretari Organizativ i Forumit Rinor të Partisë Demokratike (FRPD), Xhuljan Guçe thotë se të rinjtë shqiptarë kanë dëshirë për t’u angazhuar në politikë pasi duan ndryshim.

Në emisionin “RinVote” në Euronews Albania, Guçe u shpreh se edhe FRPD nuk e ka kryer si duhet detyrën e saj për integrimin e të rinjve dhe këtë e tregojnë rezultatet e viteve të fundit ku e djathta ka humbur në zgjedhje.

“Të rinjtë shqiptarë kanë një dëshirë të madhe për t’u angazhuar. Kjo vjen sepse ka një dëshirë të madh për ndryshim. Shpeshherë, te të dyja partitë politike kanë hasur vështirësi për t’u dëgjuar dhe zgjidhja, fatkeqësisht ka qenë largimi.

Këtu kaloj te pjesa e FRPD-së dhe detyrat dhe gabimet tona. Detyra jonë ka qenë që këta të rinj t’i përfshijmë dhe t’i japim zë që t’i ndryshojnë gjërat. Unë kam gjykuar që kemi bërë mirë, por fakti që kemi qenë jo fitues vitet e fundit, tregon që nuk e kemi bërë mirë”, theksoi ai.