Sëmundja e re që po prek Britaninë e Bashkuar, mbi 200 raste të infeksionit

Mbi 200 raste të infeksioneve nga bakteri E.coli janë raportuar në Mbretërinë e Bashkuar si rezultat i një shpërthimi të vetëm, sipas Agjencisë së Sigurisë Shëndetësore të Mbretërisë së Bashkuar (UKHSA). Të paktën 67 persona janë shtruar në spital dhe autoritetet paralajmërojnë se numri i rasteve pritet të rritet.

Infeksionet kanë prekur kryesisht të rinjtë, por janë raportuar raste edhe te fëmijët deri në dy vjeç dhe të moshuarit deri në 79 vjeç. UKHSA beson se shpërthimi është i lidhur me artikuj ushqimorë të shpërndarë në nivel kombëtar, pasi infeksionet janë përhapur gjeografikisht. Deri tani, 147 raste janë raportuar në Angli, 27 në Uells, 35 në Skoci dhe dy në Irlandën e Veriut.

E.coli i cili prodhon toksina Shiga është shkaku i këtij shpërthimi. Ky bakter mund të shkaktojë sëmundje të rënda të shkaktuara nga ushqimi.

Simptomat kryesore të infeksionit me E.coli përfshijnë ngërçe në stomak, diarre të rëndë që mund të përmbajë gjak, dhe në disa raste, sindromën hemolitike uremike, e cila mund të çojë në dështim të veshkave. UKHSA ka këshilluar që kushdo që ka blerë produktet të paketuara të mos i konsumojë ato dhe t’i kthejë në dyqan për rimbursim.

Për të zvogëluar rrezikun e infeksionit, UKHSA rekomandon larjen e rregullt të duarve me ujë të ngrohtë dhe sapun, shmangien e vizitave në spitale ose shtëpi të kujdesit dhe personat që ndihen keq të mos shkojnë në punë, shkollë ose çerdhe deri në 48 orë pasi simptomat janë ndërprerë. Shpërthime të ngjashme të E.coli janë raportuar edhe më parë në Mbretërinë e Bashkuar, me raste të lidhura me produktet e mishit dhe sallatave.

LEXO GJITHASHTU:

• Në Kosovë fillon të jepet terapia për parandalimin e infeksionit nga virusi HIV
• Studiuesit: Cigarja elektronike zgjidhje alternative, ul rrezikun nga sëmundjet