Serbët do të rezistojnë nëse Kosova nuk lejon targat KM, thotë Vuçiç

Presidenti i Serbisë, Aleksandër Vuçiç deklaroi se popullsia serbe në Kosovë do të rezistojë, nëse nuk do të lejohet lëvizja e automjeteve me targa KM.

Deklaratën, Vuçiç e dha gjatë një konference për shtyp në Beograd, pas mbledhjes së Këshillit të Sigurisë Kombëtare, shkruan Euronews Serbia.

“Plani i tyre është që ato automjete të lëshojnë (Kosovën) duke moslejuar që të kthehen në territorin e Kosovës”. Kjo me siguri do të hasë në rezistencën demokratike nga populli serb, dhe shteti i Serbisë nuk do të lejojë persekutimin dhe vrasjen e popullit të tij”, theksoi Vuçiç.

Ai nënvizoi se i pranojnë targat neutrale ndaj statusit – KS, por se, sipas tij, pala kosovare nuk dëshiron të dëgjojë për to.

Më 31 korrik dhe 1 gusht serbët lokalë në veri të Kosovës kanë vendosur barrikada si shenjë pakënaqësie ndaj vendimit të qeverisë së Kosovës për zbatim të dy vendimeve: për targat e makinave dhe dokumentet serbe.

Vendimi për zbatim të këtyre dy vendimeve është shtyrë për 1 shtator, edhe me kërkesë të mekanizmave ndërkombëtarë.

Ndërkohë është arritur marrëveshje për dokumentet për hyrje/dalje. Kosova dhe Serbia zhvillojnë dialog për normalizimin e raporteve që nga viti 2011.

LEXONI GJITHASHTU

• Rakiç: Nëse konfiskohen automjetet e serbëve me targat KM, bllokojmë veriun
• ‘Po u digjen shtëpitë’, Osmani: Qytetarët po kërcënohen për targat
• Vuçiç mbledh sot Këshillin e Sigurisë Kombëtare, do diskutohet për Kosovën