Serbët “kundër” euros në Kosovë, Lista Serbe: Po na dëbojnë pa armë

Vendimi i Bankës Qendrore të Kosovës për të shpallur euron si valutën e vetme për kryer pagesa ka sjellë pakënaqësi në komunitetin serb.

Në Mitrovicën e Veriut, buxheti i Serbisë paguan rroga, pensione dhe asistenca me dinarë e për këtë qytetarët druhen se do përballen me pengesa që nga muaji shkurt.

Lista Serbe, partia më e madhe e serbëve në Kosovë, tha se heqja e dinarit do të thotë “dëbim i serbëve pa përdorimin e armëve”.

“Regjimi autoritar i kryeministrit Kurti tani vendosi që ta ndalojë dinarin në Kosovë dhe kështu ta kërcënojë drejtpërdrejt mbijetesën fizike të popullit serb”, tha Lista Serbe në reagim.

Sipas zëvendëskryeministrit të Kosovës, Besnik Bislimi, rëndësia e veçantë e rregullores së BQK-së qëndron te përcaktimi i valutës që lejohet të përdoret në të gjitha transaksionet bankare e jobankare në Kosovë, e që në këtë rast është euroja.

Në rregulloren e BQK-së thuhet se importi dhe eksporti i kartëmonedhave dhe monedhave metalike euro dhe i valutave të tjera në Kosovë, do të jenë e drejtë ekskluzive e saj.

Deri më tani, dinarët kanë hyrë nga Serbia në Kosovë përmes Bankës Popullore të Serbisë, e cila ka një kasafortë në Leposaviç.

Rregullorja e Bankës së Kosovës, thekson se valutat tjera, që nuk janë euro, mund të përdoren në Kosovë vetëm si vlerë që ruhet në formë fizike ose në llogaritë bankare të valutave që nuk janë euro. Me to mund të kryhen edhe pagesa ndërkombëtare në valuta të ndryshme nga euroja.

LEXONI GJITHASHTU:

• Kosova heq nga qarkullimi dinarin, BQK: Pagesat do të kryhen vetëm me euro
• Shqipëria e Kosova bashkohen me hekurudhë, zbulohen qytetet që do lidhen përmes saj