Serbia arreston në kufi 73-vjeçarin nga Kosova për krime lufte, familjarët hedhin poshtë akuzat

Ministria serbe e Punëve të Brendshme ka njoftuar se e ka arrestuar një person nga Kosova me iniciale O.S Ai u kap në pikëkalimin kufitar në Mutivodë.

Sipas një njoftimi të kësaj ministrie ai dyshohet se “më 14 qershor 1999, në lagjen Sofali të Prishtinës në bashkëpunim me disa pjesëtarë të UÇK-së,  me armë të ftohta dhe armë zjarri, në mënyrë mizore dhe tinëzare, ka privuar nga jeta civilë të nacionalitetit serb, çiftin bashkëshortor Vladimir dhe Persa Stanisavljeviç.

Të ndaluarit i është caktuar masa e paraburgimit prej 30 ditësh, dhe një kallëzim penal është dërguar në Prokurorinë për Krime të Luftës në Beograd. Familjarët e të arrestuarit kanë reaguar në Facebook duke i hedhur poshtë akuzat.

“Ju njoftojmë se babai ynë, Osman Selmani, është arrestuar më 01.07.2026 në pikën kufitare Mutivodë, teksa po kthehej nga vendlindja e tij. Aktualisht, ai ndodhet në Prokurorinë për Krime Lufte në Beograd, përballë akuzave të cilat ne, si familje, i konsiderojmë të pabazuara dhe të pavërteta.

Ne besojmë në pafajësinë e tij dhe do të qëndrojmë pranë tij deri në zbardhjen e plotë të së vërtetës. Kemi besim se drejtësia do të mbizotërojë dhe e vërteta do të dalë në pah. Ju falënderojmë nga zemra për çdo mbështetje, lutje dhe fjalë inkurajuese në këto momente të vështira për familjen tone”, shkruan në një mesazh nga familja.