Serbia dhe Kina zhvillojnë për herë të parë stërvitje të përbashkët ushtarake

Serbia dhe Kina pritet të mbajnë për herë të parë një stërvitje të përbashkët ushtarake në fund të këtij muaji, njoftoi të hënën Ministria e Mbrojtjes së Kinës.

Sipas zëdhënësit të ministrisë, kolonel Jiang Bin, stërvitja me emrin “Paqeruajtësit 2025” do të zhvillohet në provincën Hebei, në Kinën veriore, dhe do të përfshijë forcat speciale të të dy vendeve.

“Ky do të jetë ushtrimi i parë i përbashkët midis ushtrisë kineze dhe asaj serbe. Ai synon të forcojë aftësitë luftarake të pjesëmarrësve dhe të thellojë bashkëpunimin mes dy ushtrive,” deklaroi Jiang në një konferencë për shtyp.

Serbia, një vend ushtarakisht neutral, është pjesë e programit “Partneriteti për Paqe” të NATO-s, por mban marrëdhënie të ngushta me Kinën, të cilat të dyja i cilësojnë si “partneritet strategjik”. Beogradi zyrtar mbështetet te Kina për investime ekonomike dhe kredi, si dhe për përkrahje në organizatat ndërkombëtare në kundërshtimin e pavarësisë së Kosovës.

Stërvitja vjen në një kohë kur Serbia ruan balancën mes aspiratave për anëtarësim në Bashkimin Evropian dhe lidhjeve të ngushta me vende si Kina dhe Rusia.

LEXONI GJITHASHTU:

• Trump: Miliarda dollarë pajisje ushtarake do të dërgohen në Ukrainë
• Trump e kërcënon Rusinë me tarifa nëse nuk ka marrëveshje brenda 50 ditësh