Serbia reagon pas dënimit të ish-zyrtarit të Listës Serbe për ‘Reçakun’

Zyrtari i Listës Serbe, Ivan Todosijeviç është dënuar të mërkurën me një vit burgim, në seancën e rigjykimit – për “përhapje të urrejtjes dhe jotolerancës”, ka konfirmuar për Radion Evropa e Lirë, avokati e tij, Nebojsha Vllajiç.

Todosijeviç pati deklaruar në mars të vitit 2019 se “arsyeja për agresionin e NATO-s ka qenë e ashtuquajtura katastrofë humanitare në Kosovë dhe masakra e trilluar e Reçakut”, shkruan REL.

Drejtori i Zyrës për Kosovën në Qeverinë e Serbisë, Petar Petkoviç ka thënë se dënimi ndaj Todosijeviqiç është “i turpshëm, i motivuar etnikisht dhe politikisht”.

Sipas tij, aktgjykimi ka treguar se serbëve në Kosovë u mohohet liria e fjalës dhe se autoritetet e Kosovës, në fakt po përhapin “urrejtje dhe jotolerancë racore, fetare dhe etnike ndaj serbëve”.

“Nuk ka dyshim se ky aktgjykim është llogaritur me kujdes në Prishtinë, me qëllim të shkaktimit të tensioneve të reja dhe krizës në mesin e popullit serb, veçanërisht në veri të krahinës, sepse asnjë serb në Kosovë dhe Metohi nuk mund të shikojë pozitivisht këtë lloj hakmarrjeje, kundër njërit prej tyre”, ka thënë Petkoviç.

Ai u ka bërë thirrje serbëve që të mos bien në “provokime të paramenduara” dhe të qëndrojnë të qetë.

LEXONI GJITHASHTU:

• SHBA-ja kërkon nga Kosova dhe Serbia të shmangin tensionet për targat
• Vuçiç: Serbia nuk ndryshon qëndrim për sanksionet ndaj Rusisë