SHBA drejt normalitetit, Nju Jorku rihap baret dhe restorantet, Los Anxheles kinematë

Në Shtetet e Bashkuara janë administruar tashmë 100 milionë doza vaksinash anti-COVID. Presidenti Joe Biden ka vendosur fundin e majit si afatin për kthimin në jetën normale. Por në Nju Jork, baret, restorantet dhe kinematë i kanë hapur dyert.

Në Los Anxheles, adhuruesit e kinemasë mundën të kthehen në salla, përballë ekranit të madh pas një viti të gjatë mbylljeje.

“Ne ishim këtu edhe dje. Nuk ngopemi me filma, ndaj dhe jemi kthyer sërish”, shprehet një qytetar.

“Ne sapo u vaksinuam dhe nuk na besohet që mund të kthehemi sërish në kinema. Më duket sikur Amerika ka kaluar një epokë dhe ndihem sikur ajo po rikthehet, sikur ka një lloj normalizimi. Por në të njëjtën kohë mundohemi të ruajmë sigurinë e shëndetit”, tha një tjetër

Sallat e kinemasë në mbarë Shtetet e Bashkuara u mbyllën rreth 1 vit më parë si pasojë e coronavirusit.

Tani, AMC, rrjeti më i madh i kinemave në vend, planifikon të rihapë thuajse të gjitha sallat brenda muajit. Ndaj, kushdo që parapëlqen ekranin e madh do të ketë më shumë mundësi për të zgjedhur.