SHBA gati të ndihmojnë Ukrainën, FT: Garanci tokësore dhe ajrore

Shtetet e Bashkuara janë shprehur të gatshme të ofrojnë burime inteligjence dhe mbikëqyrjeje ushtarake në fushën e betejës, në kuadër të planit për sigurinë e Ukrainës së pasluftës.

Lajmin e bën të ditur britanikja “Financial Times”, sipas të cilës administrata amerikane është gjithashtu gati të bëhet pjesë e një mburoje ajrore të udhëhequr nga Evropa, përmes një zone ndalim-fluturimi.

Plani i kryeqyteteve perëndimore përfshin një zonë të demilitarizuar dhe ndoshta një patrullë forcash paqeruajtëse nga një vend i tretë, i pranuar nga Kievi dhe Moska.

Prapa kësaj, një kufi më i fortë i mbrojtur nga trupat ukrainase të armatosura dhe të stërvitura nga NATO, e pasuar nga një vijë e tretë, e përbërë nga forcat mbrojtëse evropiane.

Sipas gazetës britanike, që citon funksionarë evropianë dhe ukrainas, plani i është përcjellë Brukselit nga zyrtarë të lartë amerikanë.

Më herët, i ashtuquajturi Koalicioni i Vullnetarëve, i drejtuar nga Mbretëria e Bashkuar dhe Franca, ka premtuar se do të mbrojë Ukrainën e pasluftës nga agresione të tjera ruse.

Por funksionarët evropianë kanë pranuar privatisht se çdo angazhim i trupave duhet të bëhet vetëm me mbështetjen e Shteteve të Bashkuara, të cilat do të asistojnë trupat evropiane.

Uashingtoni e furnizon prej kohësh Kievin me raketa mbrojtëse “Patriot”, por mbështetja në përfundim të konfliktit përfshin avionë amerikanë, logjistikë, radarë tokësorë dhe zonën e ndalim-fluturimit.

LEXONI GJITHASHTU:

• Trump: Nëse dikush vret në Washington, do dënohet me vdekje
• Trump mesazh Kinës: Duhet të na japin magnete, ndryshe do vendosim tarifa 200%