SHBA i dha “Ok”, Zelensky: Raketat do flasin vetë

Presidenti ukrainas, Volodymyr Zelensky, ka reaguar për herë të parë pas vendimit të presidentit amerikan, Joe Biden, i cili autorizoi Kievin për përdorimin e raketave amerikane me rreze të gjatë veprimi brenda territorit rus.

Në një deklaratë në rrjete sociale, Zelensky theksoi: “Shumë media po raportojnë se kemi marrë leje për të ndërmarrë veprime të tilla, por goditjet nuk kryhen me fjalë. Gjëra të tilla nuk njoftohen. Raketat do të flasin vetë”.

Ky zhvillim erdhi pas një periudhe të gjatë kërkesash nga Zelensky për heqjen e kufizimeve mbi përdorimin e raketave me rreze të gjatë veprimi, për të mundësuar sulme në territorin rus. SHBA, si furnizuesi kryesor i armëve për Ukrainën që nga fillimi i konfliktit, ka ofruar pajisje dhe armë me vlerë rreth 55.5 miliardë dollarë, sipas të dhënave të Institutit Kiel për Ekonominë Botërore.

Aleatë të tjerë, përfshirë Britaninë e Madhe dhe Gjermaninë, kanë kontribuar gjithashtu me ndihma, me vlera përkatësisht prej 9.6 dhe 11 miliardë dollarësh. Pavarësisht ndihmës, përdorimi i raketave të furnizuara nga këto vende, si Storm Shadow nga Britania, është kufizuar vetëm për objektiva jashtë territorit rus.

Ky vendim i SHBA mund të shënojë një pikë kthese në konflikt, duke e përshkallëzuar më tej përplasjen midis Ukrainës dhe Rusisë.