SHBA-ja do të kufizojë azilin në kufirin me Meksikën

Administrata e presidentit amerikan, Joe Biden, do të fillojë të refuzojë azilin për migrantët që shfaqen në kufirin Shteteve të Bashkuara me Meksikën, nëse ata nuk kanë aplikuar më parë në internet ose pa kërkuar mbrojtje në një vend përmes së cilit kanë kaluar.

Ky vendim është në kuadër të masave të reja që synojnë të godasin kalimet e paligjshme të kufirit duke krijuar rrugë të reja ligjore, duke përfshirë një plan për hapjen e njëqind qendrave rajonale të migracionit në të gjithë hemisferën perëndimore, thanë zyrtarët e administratës amerikane, raporton AP.

Për këtë masë të re u njoftua për herë të parë në muajin shkurt. Një gjë është e sigurt, ky vendim do të përballet me sfida ligjore.

Në vitin 2019, presidenti i atëhershëm amerikan, Donald Trump, ndoqi masa të ngjashme, por më të rrepta, por një gjykatë federale e apelit i pengoi ato të hynin në fuqi.

Zyrtarët amerikanë thanë gjithashtu se kishin plane për të hapur qendra rajonale përreth kufirit, ku emigrantët mund të aplikonin për të shkuar në SHBA, Kanada ose Spanjë, shkruan Radio Evropa e Lirë.

Për themelimin e dy qendra të tilla, pati njoftime më parë, përfshirë një në Guatemalë dhe një në Kolumbi.

LEXONI GJITHASHTU:

• Ndërron jetë legjenda meksikane, i pari futbollist që ka luajtur në 5 Kupa Bote
• SHBA-ja dhe Meksika përgatiten për një krizë emigrimi