SHBA-ja e shpall gazetarin e WSJ-së si “të arrestuar gabimisht” në Rusi

Shtetet e Bashkuara e shpallën gazetarin Evan Gershkovich si “të arrestuar gabimisht” nga Rusia dhe bënë thirrje për lirimin e tij të menjëhershëm.

Gershkovich, gazetar me përvojë në Rusi, u arrestua muajin e kaluar në qytetin e Jekaterinburgut, ndërkohë që punonte për gazetën Wall Street Journal (WSJ).

Ai u akuzua formalisht për spiunazh edhe pse WSJ i mohoi akuzat. Është hera e parë që nga koha sovjetike që Moska akuzon një gazetar amerikan për spiunazh.

Emërtimi “i arrestuar gabimisht” në SHBA do të thotë se rasti duhet të transferohet në zyrën e të dërguarit të posaçëm për çështjet e pengjeve. Kjo, gjithashtu, do ta rrisë profilin e rastit dhe do t’i lejojë qeverisë amerikane të ndajë më shumë burime për të siguruar lirimin e tij.

“Emërtimi u bë nga sekretari amerikan i Shtetit, Antony Blinken, i cili kërkoi lirimin e menjëhershëm të gazetarit”, tha zëdhënësi i tij, Vedant Patel.

“Gazetaria nuk është krim. Ne e dënojmë shtypjen e vazhdueshme të Kremlinit ndaj zërave të pavarur në Rusi dhe luftën e tij të vazhdueshme kundër së vërtetës”, tha Patel.

Ai, gjithashtu, tha se Rusia nuk u ka lejuar zyrtarëve konsullorë amerikanë qasje te Gershkovichi – gjë që është në kundërshtim me ligjin ndërkombëtar.

Gazeta WSJ tha se po bën “gjithçka në fuqinë e saj për të mbështetur gazetarin dhe familjen e tij”.

LEXONI GJITHASHTU:

• Luksemburgezi: Dua të marr pasaportën shqiptare, e adhuroj Shqipërinë
• Transporti falas në Luksemburg. Kuzhinierja: Urbanët janë pa faturino dhe me kamera
• Biden i kërkon Rusisë të lirojë gazetarin amerikan