SHBA reagon për rrëzimin e avionit në Kazakistan: Çfarë tregojnë provat që kemi

Shtetet e Bashkuara kanë deklaruar se kanë prova që sugjerojnë se Rusia mund të ketë luajtur një rol në rrëzimin e avionit të kompanisë Azerbajxhan Airlines më 25 dhjetor, që shkaktoi 38 viktima. Zëdhënësi i Shtëpisë së Bardhë, John Kirby, konfirmoi se SHBA ka ofruar mbështetje për hetimin, pa zbuluar detaje të mëtejshme.

Raportet fillestare sugjerojnë se avioni, i cili po përpiqej të ulej në Çeçeni, mund të jetë goditur nga sistemet ruse të mbrojtjes ajrore përpara se të devijohej mbi Detin Kaspik, ku më pas u rrëzua në Kazakistan. Sipas burimeve në Azerbajxhan, ndërhyrja elektronike në sistemet GPS-it të avionit dhe goditjet nga shpërthimet e raketave mund të kenë qenë shkaktarët kryesorë.

Ministri i Transportit të Azerbajxhanit, Rashad Nabiyev, deklaroi se avioni u rrëzua për shkak të “ndërhyrjeve nga jashtë” dhe raportoi dëshmi nga të mbijetuarit, të cilët thanë se dëgjuan tre shpërthime mbi Grozny, Çeçeni. Piloti kishte kërkuar të bënte një ulje emergjente, por ishte devijuar larg pistave të afërta.

Autoritetet ruse nuk kanë pranuar të komentojnë mbi incidentin, ndërsa Kremlini, përmes zëdhënësit Dmitry Peskov, tha se hetimi është në vazhdim dhe çdo vlerësim do të bëhet pas përfundimeve zyrtare. Ndërkohë, Rusia dhe Kazakistani kanë propozuar një hetim nga një komitet i Komonuelthit të Shteteve të Pavarura (CIS), por Azerbajxhani kërkon një hetim ndërkombëtar për zbardhjen e plotë të ngjarjes.

Pilotët e aeroplanit Embraer 190 kanë marrë vlerësime për përpjekjet e tyre heroike për të shpëtuar 29 nga 67 personat në bord, pavarësisht dëmtimeve të mëdha të avionit.

Incidenti ndodhi në një kohë tensionesh të larta në rajon, ku Rusia është përfshirë në konflikte të ndryshme, përfshirë luftën në Ukrainë dhe çështje të tjera në Kaukaz. Kreu i aviacionit civil të Rusisë e ka cilësuar situatën në Çeçeni si “shumë të ndërlikuar,” për shkak të sulmeve të pretenduara të avionëve ukrainas në rajon.

Të gjitha palët presin përfundimet e hetimit, ndërsa presioni për një hetim transparent dhe të pavarur mbetet i lartë.

LEXONI GJITHASHTU:

• “Avioni në Kazakistan u qëllua me raketë”- Rusia reagon ndaj hipotezave të hedhura
• “Pasagjeri i lutet Zotit”, dalin pamjet brenda avionit pak momente para rrëzimit
• Video dramatike/ Iu lut Zotit kur avioni ishte në ajër, e falenderon nga toka