Presidenti Donald Trump, ka njoftuar se do të vendosë një taksë importi prej 25% për të gjithë çelikun dhe aluminin që importohet në Shtetet e Bashkuara, një masë që pritet të ndikojë ndjeshëm mbi Kanadanë.
Trump deklaroi gjithashtu se gjatë javës do të shpallë tarifa reciproke për të gjitha vendet që vendosin taksa ndaj importeve amerikane, pa specifikuar se cilat shtete do të preken apo nëse do të ketë përjashtime.
“Nëse ata na taksojnë ne, ne i taksojmë ata,” tha Trump.
Kjo lëvizje përfaqëson një përshkallëzim të mëtejshëm të politikës së tij tregtare, e cila tashmë ka provokuar hakmarrje nga Kina.
Kanadaja dhe Meksika janë ndër partnerët më të mëdhenj tregtarë të SHBA-së për çelikun, ndërsa Kanadaja është furnizuesi kryesor i aluminit për ekonominë amerikane. Gjatë mandatit të tij të parë, Trump vendosi tarifa prej 25% për çelikun dhe 10% për aluminin nga Kanadaja, Meksika dhe Bashkimi Evropian. Megjithatë, një vit më vonë, SHBA arriti një marrëveshje me Kanadanë dhe Meksikën për heqjen e tarifave, ndërsa ato për BE-në mbetën në fuqi deri në vitin 2021.
Duke folur në bordin e Air Force One, Trump theksoi se masat e reja do të përfshijnë të gjitha importet e çelikut dhe aluminit në SHBA.
“Çdo çelik që hyn në Shtetet e Bashkuara do të tatohet me 25%,” deklaroi ai.
Lëvizja e Trumpit shkaktoi gjithashtu rënie të aksioneve të prodhuesve kryesorë të çelikut dhe industrisë automobilistike në Korenë e Jugut, një nga eksportuesit më të mëdhenj të çelikut në SHBA.
Ndërkohë, kryeministri australian, Anthony Albanese, deklaroi se qeveria e tij do të argumentojë në SHBA për përjashtimin e Australisë nga këto tarifa – një përjashtim që ajo kishte marrë gjatë mandatit të parë të Trumpit.
Vendimi i Trumpit për tarifat ndaj metaleve erdhi pasi Kina vendosi taksa mbi disa mallra amerikane. Këto masa u ndërmorën pasi SHBA vendosi tarifa prej 10% për të gjitha importet nga Kina javën e kaluar.
Pekini iu kundërpërgjigj duke vendosur një taksë kufitare prej 15% për importet e qymyrit amerikan dhe gazit natyror të lëngshëm, si dhe një tarifë prej 10% për naftën bruto amerikane, makineritë bujqësore dhe automjetet me motor të madh. Për më tepër, Kina vendosi kontrolle eksporti për 25 metale të rralla, të cilat janë thelbësore për shumë produkte elektronike dhe pajisje ushtarake.
Zëdhënësi i qeverisë kineze, Guo Jiakun, deklaroi: “Nuk ka fitues në një luftë tregtare. Ajo që dëmtohet janë interesat e qytetarëve të të dy vendeve.”
Ai i kërkoi SHBA-së të ndryshojë qasjen dhe të ndalojë përdorimin e tregtisë si një armë politike.
Ndërkohë, diplomati dhe ekonomisti kinez, Victor Gao, e cilësoi vendimin e Kinës për të kufizuar eksportin e metaleve të rralla si një hakmarrje të drejtpërdrejtë ndaj politikave të SHBA-së, të cilat kufizojnë aksesin kinez në çipat gjysmëpërçues dhe teknologjitë e inteligjencës artificiale.
“Kina dëshiron tregti të lirë për të gjitha këto mallra,” tha ai. “Por, mallrat kineze mbeten konkurruese edhe me një tarifë prej 10%.”
Tarifat janë një pjesë kyçe e politikës ekonomike të Trumpit, i cili i sheh ato si një mënyrë për të mbrojtur punësimin dhe për të rritur të ardhurat e SHBA-së.
Në fillim të muajit, ai kërcënoi se do të vendoste një tarifë 25% për produktet nga Kanadaja dhe Meksika, por e shtyu vendimin me 30 ditë pas bisedimeve me liderët e këtyre vendeve.
Gjithashtu, ai vendosi një taksë 10% për të gjitha mallrat kineze që hyjnë në SHBA, çka nxiti kundërpërgjigjen e Pekinit me tarifat e veta, të cilat hynë në fuqi të hënën.
Trump ka paralajmëruar se do të shpallë tarifa të reja brenda pak ditësh dhe se ato do të hyjnë në fuqi menjëherë pas njoftimit.
“Ata që përfitojnë nga SHBA-ja, ne do t’i taksojmë në mënyrë reciproke,” tha ai. “Do të jetë e dobishme për të gjithë, përfshirë vendet e tjera.”
Gjatë udhëtimit në New Orleans, Trump nënshkroi një shpallje që caktonte 9 shkurtin si “Dita e Gjirit të Amerikës”, në shenjë të riemërimit të Gjirit të Meksikës. Meksika kundërshtoi këtë vendim, duke argumentuar se SHBA nuk mund ta ndryshojë emrin ligjërisht sipas rregullave të OKB-së.
Ish-presidenti u pyet gjithashtu nëse kishte folur me presidentin rus, Vladimir Putin, por ai refuzoi të jepte detaje.
“Besoj se po bëjmë përparim,” tha ai. “Do të takohem me Putinin në kohën e duhur.”
Trump gjithashtu përsëriti idetë e tij kontroverse, duke sugjeruar se Kanadaja mund të bëhej “shteti i 51-të” i SHBA-së dhe duke deklaruar se ai ishte i “përkushtuar për të blerë dhe zotëruar Gazën”.
LEXONI GJITHASHTU:
- Trump: Kontrolli financiar nga Elon Musk do të zbulojë abuzime në Pentagon
- Trump: Kam biseduar me Presidentin rus Putin për Ukrainën
