SHBA: Vdekja e udhëheqësit të Hamasit mund të ndihmojë fundin e luftës në Gazë

Presidenti amerikan Joe Biden dhe Nënpresidentja Kamala Harris thanë të enjten se vdekja e udhëheqësit të Hamasit, Yahya Sinwar, përgatiti terrenin për rikthimin e pengjeve izraelite dhe përfundimin e luftës në Gazë.

Vrasja e Yahya Sinwarit, organizatori i sulmit të 7 tetorit 2023, që shkaktoi luftën në Gazë nga forcat izraelite në enklavën palestineze, shënon një sukses të madh për Izraelin dhe një moment historik në konfliktin njëvjeçar.

“Tani është koha për të ecur përpara. Vazhdoni, lëvizni drejt një armëpushimi në Gaza, sigurohuni që po ecim në një drejtim që do të jemi në gjendje t’i bëjmë gjërat më mirë për të gjithë botën”, u tha Presidenti Biden gazetarëve pas mbërritjes në Gjermani, pasi bëri një bisedë telefonike me kryeministrin izraelit Benjamin Netanyahu.

Presidenti amerikan, Joe Biden, tha përmes një deklarate se Izraeli e kishte informuar më herët gjatë 17 tetorit se me gjasë e ka vrarë Sinwarin. Por, shtoi se tani rezultatet e ADN-së e kanë konfirmuar se Sinwari është i vdekur.

“Kjo është një ditë e mirë për Izraelin, SHBA-në dhe për botën”, tha udhëheqësi amerikan.

Biden tha se Sinwar, si udhëheqës i Hamasit, ishte përgjegjës për vrasjen e mijëra izraelitëve, palestinezëve, amerikanëve dhe shtetasve nga 30 shtete të botës.

Biden tha se pas sulmit të 7 tetorit të vitit të kaluar, ai ka urdhëruar personelin e operacioneve speciale dhe zyrtarët e inteligjencës që ta ndihmojnë Izraelin që ta gjejë Sinwarin dhe udhëheqësit e tjerë të Hamasit në Gazë. Ai tha se me ndihmën e inteligjencës amerikane, ushtria izraelite papeshuar ka ndjekur liderët e Hamasit.

“Dita e sotme është dëshmi se asnjë terrorist, kudo në botë, nuk mund t’i ikë drejtësisë”, tha ai.

Udhëheqësi amerikan tha se Izraeli ka të drejtë të eliminojë udhëheqjen dhe strukturën e Hamasit, duke shtuar se grupi izraelit më nuk ka aftësi që të kryejë një sulm sikurse ai i 7 tetorit.

“Tani ka mundësi për një ‘ditë të re’ në Gazë, pa Hamasin në pushtet, dhe për një zgjidhje politike që ofron të ardhme më të mirë për izraelitët dhe palestinezët. Yahya Sinwar ishte një pengesë e madhe për arritjen e këtyre qëllimeve. Kjo pengesë më nuk ekziston. Por, para nesh ka ende shumë punë”, tha Biden.

Ndërkaq, edhe nënpresidentja amerikane, Kamala Harris, tha se Hamasi më nuk është i aftë të kryejë një sulm tjetër sikurse ai i 7 tetorit dhe vrasja e Sinwarit, “na jep një mundësi që përfundimisht t’i japim fund luftës në Gazë”.

LEXONI GJITHASHTU:

• “Arkitekti i sulmit të 7 tetorit”, Izraeli spekulon për vdekjen e liderit të Hamasit
• OKB paralajmëron Izraelin kundër transferimit me forcë të civilëve nga veriu i Gazës