SHBA vendos sanksione ndaj 3 personave të lidhur me vdekjen e Navalny

Shtetet e Bashkuara të Amerikës kanë vendosur sanksione të reja ndaj tre personave të lidhur me vdekjen e liderit të opozitës ruse Alexei Navalny.

Sipas mediave të huaja, Navalny vdiq në një burg të largët të Arktikut në shkurt në rrethana të panjohura.

Autoritetet ruse thonë se ai vdiq për shkaqe natyrore, ndërsa mbështetësit e tij besojnë se ai u vra.

Udhëheqësit perëndimorë e konsideruan shpejt Vladimir Putinin përgjegjës për këtë ngjarje, por një raport i inteligjencës amerikane në fillim të kësaj jave zbuloi se presidenti rus ka të ngjarë të mos ketë urdhëruar drejtpërdrejt vdekjen e Navalny-t.

Të tre individët janë mes qindra njerëzve dhe subjekteve të shënjestruar në raundin e ri të sanksioneve të Uashingtonit lidhur me Rusinë.

Një njoftim në faqen e internetit të thesarit tha se kompanitë e lidhura me projektin rus të gazit të lëngshëm natyror ‘Arktik 2’ ishin ndër ato që u goditën me sanksione.

Kufizime janë vendosur edhe për transportuesin ajror rus Pobeda, një degë e linjës ajrore më të madhe të vendit Aeroflot.

LEXONI GJITHASHTU:

• WSJ: Agjencitë e Inteligjencës së SHBA thonë se Putin nuk urdhëroi vdekjen e Navalny
• Pezullohet prifti ortodoks që udhëhoqi ceremoni në varrimin e Navalnyt