Sheinbaum: SHBA nuk do të dërgojnë trupa në Meksikë, nuk do të ndodhë

Presidentja e Meksikës, Claudia Sheinbaum ka mohua rapotet se Shtetet e Bashkuara po planifikojnë të dërgojnë trupa në Meksikë për t’u përballur me kartelet e fuqishme të vendit. Ajo theksoi se ka refuzuar vazhdimisht oferta të tilla nga homologu i saj amerikan, Donald Trump.

“Nuk do të ndodhë. Ne nuk pajtohemi me asnjë proces ndërhyrjeje apo ndërhyrësish”, tha Sheinbaum.

Komentet e Sheinbaum vijnë pas një raporti ku shkruhej se administrata Trump ka filluar të planifikojë një mision për të dërguar trupa dhe oficerë të inteligjencës amerikane në Meksikë.

Raporti thoshte se megjithëse operacioni nuk ishte i afërt dhe nuk ishte marrë asnjë vendim përfundimtar, fazat e hershme të trajnimit kishin filluar tashmë, si dhe diskutimet rreth fushëveprimit të operacionit.

Sheinbaum këmbënguli që vendi i saj nuk kishte asnjë informacion në lidhje me një ndërhyrje të tillë të planifikuar. Ajo pranoi se në telefonatat me Trump, presidenti amerikan kishte ofruar të dërgonte trupa dhe mbështetje të tjera për t’u përballur me krimin e organizuar.

“Gjithmonë kam thënë shumë faleminderit, President Trump. Por jo, Meksika është një vend i lirë, i pavarur dhe sovran”, tha Sheinbaum.

• LEXONI GJITHASHTU:
• Raporti global, bie me 41% vdekshmëria amtare përgjatë 20 vite të fundit
• Shkarkohet nga detyra drejtori i AKSH Sarandë, Ilir Çibuku