Shembet një minierë në Kongon lindore, 200 persona humbasin jetën

Një rrëshqitje toke më herët këtë javë shkatërroi disa miniera në një vend të madh minierash koltan në Kongon lindore, duke lënë të paktën 200 të vdekur, thanë të shtunën autoritetet vendase.

Shembja ndodhi të mërkurën në minierat Rubaya, të cilat kontrollohen nga rebelët M23, tha për Associated Press Lumumba Kambere Muyisa, zëdhënësi i guvernatorit të emëruar nga rebelët në provincën North-Kivu. Ai tha se rrëshqitja e dheut u shkaktua nga shirat e rrëmbyeshëm.

“Për momentin, ka më shumë se 200 të vdekur, disa prej të cilëve janë ende në baltë dhe nuk janë gjetur ende”, tha Muyisa. Ai shtoi se disa të tjerë u plagosën dhe u dërguan në tre qendra shëndetësore në qytetin Rubaya, ndërsa ambulancat pritej të transferonin të plagosurit të shtunën në Goma, qyteti më i afërt rreth 50 kilometra larg.

Guvernatori i Kivusë së Veriut, i emëruar nga rebelët, ka ndaluar përkohësisht minierat artizanale në vend dhe ka urdhëruar zhvendosjen e banorëve që kishin ndërtuar strehimore pranë minierës, tha Muyisa.

Një ish-minator në vend tha se ka pasur rrëshqitje të përsëritura të dheut sepse tunelet janë gërmuar me dorë, janë ndërtuar dobët dhe janë lënë pa mirëmbajtje.